Sa ika-onseng higayon, nasakmit napud sa College of Arts and Sciences (CAS) ang titulong mananaog – gikan sa cheerdance, dance palabas hangtod sa playground demonstration.
Isip usa sa mga nahisaag nga naapil intawon sa prestihiyosong kompetesyon, nasinati ko ang dughang malipayon. Kuyog sa akong mga kauban, wa namo damha nga makadaog kami atong higayona. Kay sa pagpraktis palang namo daan sa among himuong ekshibisyon, daghan nang magtutudlo ug estudyante ang sige’g bagutbot.
“Mapildi najud ang CAS ani,” tubag sa estudyante.
“Way ayo ilaha. Mas nindot pa ang CTE,” segun pa sa usa.
Mao kadto ang mga komentong magsige ra ug balik-balik sa akong alimpatakan. Daw murag magpahiubos usahay kay naninguha baya intawon pud mi kutob sa among mabuhat. Imbes na suportaan mi, mura pa hinuon intawon mig gisamotan sa among pagkaway-ayo.
Ug sa dihang ang adlaw na jud sa kompetisyon niabot na. Daw pagkamalas ba kay sa among pag-present ayha pa nibundak ang uwan. Pero wa kadto namo gihatagan ug pagtagan. Kon sa Ingles pa, “The show must go on.”
Singgit diri, tiyabaw didto. Mao kini ang naghatag kanamo ug igong kusog kay dili diay tanan nawad-an ug paglaom kanamo.
Pakpak ngari, pakpak ngadto; ang madunggan namo bisan nag-ulan pa pag-ayo. Wala na namo hunahuna-a nga lahi ming tanan. Nagsilbi nalang nga usa kami ka pamilya nga naghugpong aron makab-ot namo ang kadaugan hangtod sa katapusan.
Ug sa dihang gi-anunsyo na kon kinsa ang mananaog, daw mura ko’g naibtan ug tunok sa pagkadungog nako sa among departamento isip mananaog sa maong field demo.
Nalipay gayud ang tanan kay nakab-ot napud ang kadaugan.
Labiste, April Cleofe
No comments:
Post a Comment